Thèid Seachdain na Gàidhlig 2025 a chumail eadar an 23mh latha dhen Ghearran is an 1 latha dhen Mhàrt, a’ comharradh cuspair na bliadhna, ‘Cleachd i no caill i’. Seo dhut stiùireadh beag a chuidicheas thu le bhith a’ planadh is a’ brosnachadh an tachartais agad gu soirbheachail is chan eil e gu diofar an d’fhuair thu airgead uainn no ga ruith air do cheann fhèin.

📆 Dèan plana dhan tachartas agad

• Prìomh rudan: Dèan cinnteach gu bheil an ceann-là, àm is ionad ceart agad mus tòisich thu air sanasachd.
• Liosta nan tachartasan: Cuir an tachartas agad gu mìosachan tachartasan Seachdain na Gàidhlig.
• Cudrom air a’ chuspair: Fill a-steach an t-ùrlar, ‘Cleachd i no caill i’, sna tachartasan agad air dòighean cruthachail.

⭐ Cleachd stuthan a ghlacas aire dhaoine

📸 Susbaint lèirsinneach

• Cleachd dealbhan fìor mhath dhe na daoine a bhios an sàs ann, dhe na h-ionadan no prìomh eileamaidean a’ chuspair.
• Dèan cinnteach gu bheil cead agad na dealbhan a chleachdadh. Mas urrainn dhut idir, faigh lorg air neach-togail dhealbh ionadail.
• Dèan dealbhan rè an tachartais is co-roinn iad sa bhad no ann an naidheachdan mun tachartas as dèidh làimh.

📝 Brathan-naidheachd

Tha brath-naidheachd na phìos sgrìobhte goirid is tarraingeach a bheir prìomh fhiosrachadh mun tachartas agad dha na naidheachdan. Bidh e nas fhasa mar sin am facal a sgaoileadh sna pàipearan-naidheachd ionadail, stèiseanan rèidio, foillseachaidhean air loidhne agus am measg bhuidhnean coimhearsnachd airson ’s gum bi fios aig barrachd dhaoine mun tachartas agad. Sgrìobh e air dòigh a dh’innseas dè tha sònraichte mun tachartas agad agus carson a bhiodh e inntinneach do mhuinntir an àite. Cleachd cainnt a tha soilleir cuimir a thàlaidheas daoine thuige!

Ma tha feum agad air taic a thaobh brath-naidheachd a chruthachadh, nach cuir thu fios thugainn aig [email protected] agus nì sinn ar dìcheall do chuideachadh.

📢 Gliocasan mu na meadhanan sòisealta

• Cuir suas naidheachdan mun tachartas fhad ’s a bhios e a’ dol is thoir taing dha na daoine a bh’ ann as dèidh làimh.